विवेक वर्धिनी विद्यालयात शिक्षक–पालक सहविचार सभा उत्साहात संपन्न
विवेक वर्धिनी विद्यालयात विद्यार्थ्यांच्या सर्वांगीण विकासासाठी नेहमीच नवनवीन उपक्रमांचे आयोजन केले जाते. त्याचाच एक महत्त्वाचा भाग म्हणून इयत्ता आठवी, नववी आणि दहावीच्या पालकांसाठी आयोजित करण्यात आलेली शिक्षक–पालक सहविचार सभा अत्यंत उत्साहात व यशस्वीपणे पार पडली. विद्यार्थ्यांच्या शैक्षणिक प्रगतीसोबत त्यांच्या मानसिक, बौद्धिक व सामाजिक विकासासाठी पालकांचा सहभाग तितकाच महत्त्वाचा असल्याने ही सभा खूपच उपयुक्त ठरली.
कार्यक्रमाचे अध्यक्षस्थानी विद्यालयाचे प्राचार्य यु. आर. मुंढे सर होते. आपल्या मनोगतात त्यांनी शालेय व्यवस्थापनाची भूमिका, शैक्षणिक गुणवत्ता आणि विद्यार्थ्यांच्या सुरक्षिततेबाबतचे विद्यालयाचे धोरण यावर सविस्तर भाष्य केले. त्यांनी सांगितले की, “विद्यार्थ्यांचा सर्वांगीण विकास हा आमचा मुख्य ध्येयविचार असून, त्यांच्या सुरक्षिततेबाबत आणि शैक्षणिक सुविधांबाबत कोणतीही तडजोड केली जाणार नाही. विद्यार्थ्यांना अद्ययावत भौतिक सुविधा, आधुनिक तंत्रज्ञान, समृद्ध वाचनालय व शिस्तबद्ध वातावरण उपलब्ध करून देण्यासाठी आम्ही सदैव प्रयत्नशील आहोत.”
कार्यक्रमाचे प्रास्ताविक पर्यवेक्षक ए. ए. पवार सर यांनी केले. त्यांनी विद्यालयामध्ये राबवण्यात येणाऱ्या विविध उपक्रमांची, शैक्षणिक स्पर्धांची, सांस्कृतिक कार्यक्रमांची तसेच विद्यार्थ्यांच्या सर्वांगीण विकासासाठी सुरू असलेल्या उपक्रमांची माहिती पालकांना दिली. विद्यार्थ्यांच्या क्षमताविकासासाठी शाळा कोणत्या पद्धतीने प्रयत्न करते आणि पालकांची भूमिका यात किती महत्त्वाची आहे याबाबत त्यांनी सविस्तर मार्गदर्शन केले.
सभेमध्ये प्रशालेतील दांडगा अनुभव असलेले शिक्षक एस. एच. गुरव सर आणि सौ. एस. एस. शितोळे मॅडम यांनी विद्यार्थ्यांच्या शैक्षणिक शिस्तीवर, अभ्यास पद्धतीवर, दैनंदिन अभ्यासाच्या महत्त्वावर, तसेच विद्यार्थ्यांच्या मानसिक तयारीवर मार्गदर्शन केले. गुरव सरांनी परीक्षेच्या काळातील तणाव व्यवस्थापन, वेळेचे नियोजन व नियमित पुनरावृत्ती या महत्त्वाच्या बाबी पालकांसमोर मांडल्या. तर शितोळे मॅडम यांनी पालकांनी मुलांशी संवाद कसा साधावा, त्यांना प्रोत्साहन कसे द्यावे आणि घरातील अभ्यासाचे योग्य वातावरण कसे निर्माण करावे याबाबत उपयुक्त सूचना दिल्या.
सभेत उपस्थित पालकांनी शालेय भौतिक सुविधांबाबत, अध्यापनाच्या दर्जाबाबत, शिक्षकांच्या मेहनतीबाबत व शाळेतील वातावरणाबाबत समाधान व्यक्त केले. अनेक पालकांनी आपल्या भावना मांडताना शाळेने विद्यार्थ्यांसाठी पुरवलेल्या सुविधा, शैक्षणिक प्रगतीसाठी केलेल्या प्रयत्नांचे कौतुक केले आणि अशा सभांचे आयोजन सतत व्हावे अशी अपेक्षाही व्यक्त केली.
कार्यक्रमाचे नेटक्या शब्दांत सूत्रसंचालन पी. जी. काळेल सर यांनी केले. त्यांनी कार्यक्रमाची सांगड नीट बांधत प्रत्येक मान्यवरांची ओळख करून दिली व वातावरणात उत्साह निर्माण केला. कार्यक्रमाच्या शेवटी बी. एम. शिंगाडे सर यांनी आभारप्रदर्शन करत उपस्थित शिक्षक, पालक आणि व्यवस्थापनाचे विशेष आभार मानले.
सभेला पालकांचा प्रचंड प्रतिसाद मिळाला. मोठ्या संख्येने पालक उपस्थित होते, तसेच शाळेतील सर्व शिक्षक, शिक्षिका आणि शिक्षकेतर कर्मचारीही उपस्थित राहून कार्यक्रम यशस्वी करण्यासाठी सहकार्य केले. या फलदायी सहविचार सभेमुळे शाळा–पालक–विद्यार्थी यांच्यातील संवाद अधिक दृढ झाला असून विद्यार्थ्यांना त्याचा दीर्घकालीन फायदा निश्चितच होणार आहे.
